يا زين ارحم من يسمى ظنينك
اللي كتبت اسمه بلوحة سوارك
وارحم عهودن حررتها يمينك
ما نفذوا مضمونها باختيارك
شغلت فكري مرمسات سنينك
والحب يكبر في مساك ونهارك
حبك بقلبي يرفعك ما يدينك
مملوك عندك يدعمك في قرارك
كل الحلى ما بين ثغرك ، وعينك
الرمش يفضح خط سكة قطارك
الشامه السمرا زهت في جبينك
والجيد شعشع فوق شذرة زرارك
أجمل من الدر المرصع يدينك
والفل ، والنرجس ، يطرز ازرارك
ما عندنا شك بخوافي كنينك
على الوفا راضين نتبع مسارك
ما شفت انا بالغيد فيك ، وزينك
ربي عطاك الحسن ، واجزل وقارك