وادي عرقه شف نخيله زان طلعه
والسحاب اهدى على الرونق وشاحه
شوف ماها جاري واخضر زرعه
وردها يا زين شكله وانفتاحه
مع لطيف الروح نقضي فيه جمعه
تمضي الساعات في غمرة مزاحه
بلبل الالحان والانغام نبعه
والوتر غنى الى مطلع صباحه
غير صوتك مستشف السمع سمعه
يا هنا بالي وعزه وارتياحه
غيرك انت ما بقي للبيت شمعه
ولاحدن حطم فؤادي واستباحه
يالحبيب اللي يصير الهجر طبعه
ياخسارة فين حبه وانشراحه
شوف بعدك حط فوق الخد دمعه
توري الحساد أمري وافتضاحه
يا حياتي يا ترى للود رجعه
شوف جسمي كيف ناحل من نواحه
وننسى الماضي واحزانه بسرعه
واليكن درس المحبه والصراحه