حوراء كيف حروفها صوتت لي
خايلتها تقول يابو السموحي
من فوق اوتار الحشا دندنتلي
غنت مواويل الضنا والنزوحي
محلى كلامه كل كلمه شدت لي
شدو البلابل في غصون السفوحي
وقالت على قافي قصايد ورت لي
قصة هواها والاسى والجنوحي
وكل الخواطر بالقلم سطرت لي
نبل المشاعر والغلا والوضوحي
زرياب قلبي بصوتها غطرفت لي
بحل السوالف والدلع والمزوحي
لا تذكر الماضي ولا تعتذر لي
هرجك ومرجك والحجاج الذبوحي
عفراء مثل البدر حين ضحكت لي
وضحك لي المخنق بوجه صبوحي
والعين سودا برمشها صفقت لي
والليل اقبل في هدبها يلوحي
يالناحل الغناج لا تعترف لي
طرزت اسمك في خيالي وروحي
حبك تمكن من ضميري وعقلي
اصلك من الجوهر وطيبك يفوحي
أيام بعدك عفت شربي واكلي
وراقبت نجم سهيل حتى يروحي
ان جيت عندي المشارب صفت لي
او رحت يالمجول دربك سموحي
انكان تبعد انت ناوى لقتلي
تخلف مضامين الهوى والشروحي
وانكان تشريني ترى انت مثلي
اشرى هوى قربك بدمعي ونوحي
كل السعادة في جبينك زهت لي
من بسمة بشفاك تبري جروحي